التحقيقات

في واقعة طريفة…ممرض يطعن مرافق المريض (حقنة)

12views

 

 

طبيب شهير حكى هذه القصة التي انقلها لكم تخفيفا عن اخبار الحوادث والسياسة:

ناس باركوها باركوها

اثناء مرورنا بالعنابر عندما كنا أطباء إمتياز ، لقينا شكلة و البنية مدورة بين مرافق وممرض الساعة اتنين صباحا…!!
ومن باب اصلاح ذات البين ، قلت اشوف المشكلة شنو…المهم مسكت جار المرافق قلت عشان اعرف الغلطان منو قبلما ما اشوت في القون…
المرافق قال لي:
ممرضكم الاهبل ده جاء نص الليل شايل الحقنة ، و لقي المرافق نائم في محل المريض ، و اعتقد انه المريض الكان في حالة اغماء، و راح رافع الجلابية و قشط ليك الراجل حقنة في مؤخرته….!!
المرافق حاول يقاوم قال ليه:
الحقنة كده بتتكسر جواك اركز بس…..!!!
اها وبعدين الحصل شنو ؟
المرافق خاف تتكسر الحقنة و رخا جسمه و اخد الحقنة كلها….
و بعد الممرض طلعها منه المشكله دورت من قبيل نحن نحجز….
سقت الممرض المكتب و قلت ليه :
لازم تمشي تعتذر للزول ده ، عشان انت غلطان و عشان الزول ده لو حصل ليه مضاعفات لا سمح الله انت بتتحمل المسؤلية …
قال لي:
انا ما غلطان ولا شى المرافق هو الغلطان ، رقد في محل المريض و المريض لافي برة العنبر برضو غلطان،
ده مستشفي ما نادي،
و بعدين انا اديته حقنة كلوركين ما اديتو حقنة شرجية عشان يتشاكل معاي…والليلة يا انا يا المرافق في المستشفي ده….

__ اها ربك ، رب الخير جونا الجماعة بتاعين باركوها باركوها و اقنعوا المرافق انه غلطان.. و اقنعوا الممرض انه غلطان… و اقنعوني انا ذاتي اني غلطان…. لكن في نهاية اقنعونا كلنا أنه الغلط ده كله من الشيطان ما مننا…
وانتهت القضية علي كده….

بس ومن اليوم داك ، انا ناس *باركوها باركوها* ديل ، ما عندي ليهم اي احترام….!!
وعندي اعتقاد قوي أنهم ديل هم ذاتهم الخاربين السودان والسودانيين ….!!!
لأنهم لا بخلوا الغلطان يتحاسب.. ولا بخلوا المظلوم يأخد حقه…

د احمد الطيب إبراهيم استشاري جراحة الكلي والمسالك البولية
منقووول

Leave a Response